Urtero bezala, liburuaren egunaren inguruan osatu ohi dugun egitarauaren barnean, etxekoak geletara gonbidatu ditugu ipuinen bat irakur diezaguten. Oraingo honetan, Leire etorri zaigu 5. mailara bi libururekin.
"Hiru egun balearen sabelean" (Patxi Zubizarreta) liburutik sinopsia irakurri ondoren, II kapitulua aukeratu du ozenki kontatzeko. Ternuan dabilen baleontziaren, bertako eskifaiaren eta San Joan gauaren inguruko kapitulua da. Bale arrantzari buruz datu historikoak ematen ditu, hiztegi aberatsa agertzen du eta oso erritmo onean doan istorioa da.Oso interesgarria eta polita izan da.
Bigarren liburua aldiz, "Enigmak", Victor Escandell-ek osatutakoa da. Bertan egoera desberdinak deskribatzen ditu arazo bat planteatuz eta ematen dituen pistei erreparatuz, irtenbidea bilatu behar da.
Adi-adi egon gara konponbidea bilatu ahal izateko eta oso dibertigarria suertatu da. Ez genuen Leirek amaitzea nahi.
MILA ESKER ETXEKOEI, ETA LEIRERI BEREZIKI, LAGUNTZARENGATIK.
Iruzkinak
Argitaratu iruzkina